متن نوحه ترکی کلامی زنجانی
متن نوحه های ترکی استاد کلامی زنجانی
زبانحال حضرت زینب (سلام الله) در حال احتضار
سنی آنام جانی تز گل یامان گونومدی حسین
صولوبدی عمر بهاری خزان گونومدی حسین
گون ایستیسینده سنی کولگیه چکن باجوام
منیمده گون قاباقندا قالان گونومدی حسین
دیردیم اولمیا سندن اوزاق مکاندا ئولم
ئورکده قالدی بو حسرت همان گونومدی حسین
الیمی هئچ کسه من احتیاجه آچمامیشام
گوزوم یولوندا سنه یالواران گونومدی حسین
قویاندا من الیمی قوینوما سن آغلاردون
او نازلی گوزلریوی آغلادان گونومدی حسین
باخان دیور بونون حتما اورکده یاره سی وار
بو منظره هامینی یاندیران گونومدی حسین
یُواندا کاش منی قورخمییدی غساله
بو نیلگون بدنه غسل اولان گونومدی حسین
سنه که چاتمور الیم کوینگون قوجاخلامیشام
بونی آنام توخیوبدی فغان گونومدی حسین
یتور بو حالی بنی هاشمون جوانلارینا
گلون گلون باشیمون اوسته سان گونومدی حسین
اراده قالسا جنازم بو شامین اهلی گولر
وفالی ائللریمی آختاران گونومدی حسین
الیوی سینمه قویسان یوز ایلده من یاشارام
کسیلمیش اللری یاده سالان گونومدی حسین
سلام اولا او ابوالفضلیمون دوشن قولونا
کنار علقمه حسرت باخان گونومدی حسین
دئدیم وداعیده گئتمه گل ایندی من گئدورم
وداع گونی اتگوندن دوتان گونومدی حسین
شاعر : کلامی زنجانی
موضوع: حضرت زینب کبری (س) زبانحال ,
زبان شعر و شاعر: نوحه ترکی , کلامی زنجانی
زبانحال حضرت زینب (سلام الله) در حال احتضار
زینبین آیریلیق صبرین آلدی
قهرمانین یولون شامه سالدی
جان ویرنده دیوردی الهی
بس منیم ائلریم هاردا قالدی
ای منیم پاسبانیم ابوالفضل
لنگ اولوب کاروانیم ابوالفضل
زینبی قبلیه دوندرن یوخ
باشیوه گل دولانیم ابوالفضل
ای دوشن نهرین اوسته وجودی
قانلی بازوسی دینین عمودی
گل ایاقدان دوشوب غملی زینب
جان ویرور دلده هجران سرودی
چوخدی سن تک حسینه علاقم
نیلوم کربلادن اوزاقم
آند اولا دلده که خاطراته
بو گیجه من حسینه قوناقم
گوگلوم ایستور گله باشیم اوسته
دینجله بلکه بو دلشکسته
پیشوازه دورام خسته خسته
یولّلارا گل سپیم دسته دسته
ای آدامسیزلارین آشناسی
غملی امّ البنینین بالاسی
ای گوزل آدی باب الحوائج
زینبون دردینون یوخ دواسی
خواهشیم بیر بودور نه گلایه
ایله درمان من مبتلایه
یا حسینی گتور شامه قارداش
یا آپار زینبی کربلایه
زینبین حالینه داغلار آغلار
چولده ویران قالان باغلار آغلار
رسمیدور باجیلار جان ویرنده
گوزلرین قارداش باغلار آغلار
گل یورولدو گوزوم آغلاماقدان
تنگه گلدیم اورک داغلاماقدان
بو گوزی باغلاماق آی ابوالفضل
چوخ چتیندی یارا باغلاماقدان
من همان زینب قهرمانم
عمه پیر صاحب زمانم
هر قناد سیز قوشا لانه ویردیم
من اوزوم ایندی بی آشیانم
قلبیده نسگلیم چوخدی قارداش
جانه هجران غمی اوخدی قارداش
یدی قارداشه باجیدیم امّا
هیچ بیریندن خبر یوخدی قارداش
مایه یوخ عشقیمون مایه سینده
پایه یوخ صبریمون پایه سینده
من حسینه دعا گویم اما
قانلی بیر کوینگون سایه سینده
ای فرات اوسته پرچم وران گل
زینبین قلبینی یاندیران گل
سیندی قارداش بئلیم آیرلیقدان
ای حسینون بئلین سیندیران گل
گوگلومی گل ابوالفضلیم آل گیت
جان چیخاندا باشیم اوسته قال گیت
گون ایونده قالان نعشه خاطر
شامیده باشیمه سایه سال گیت
هیچ ایو عالمده مشعلسیز اولماز
هیچ عزا خانه گیت گلسیز اولماز
گل گوزیمی دیدوم باغلا اما
هیچ گوزی باغلاماق السیز اولماز
شاعر : کلامی زنجانی
موضوع: حضرت زینب کبری (س) زبانحال ,
زبان شعر و شاعر: نوحه ترکی , کلامی زنجانی
زبانحال حضرت زینب (سلام الله) در حال احتضار
حسین غریب باجیوام اقربا دوشوب یادیما
سارالمیشام چمن با صفا دوشوب یادیما
گوزل گولوم باجی قربان آچوب سولان یریوه
نولیدی غم گونی زینب ویریدی جان یریوه
سلام اولا او گوزل تُربته،یاتان یریوه
هایانداسان ئولورم کربلا دوشوب یادیما
من آشنای غم و یار عشقیوم قارداش
باشمدا قاره علمدار عشقیوم قارداش
یتش هرایمه بیمار عشقیوم قارداش
شمیم تربت دارالشفا دوشوب یادیما
یادوندا وار گوزلیم سن گیدنده میدانه؟
گلوب باشیوا دولاندوم مثال پروانه
لیوی سینمه قویدون ئوزون غریبانه
غریبم ایندی همان ماجرا دوشوب یادیما
شهادتونده که اورنگ نازه چخدی باشون
بدن نشیبده قالدی فرازه چخدی باشون
گلنده کوفیه من،پیشوازه چخدی باشون
جدا باشندا کی بدرالدّجا دوشوب یادیما
گرک اورکده باجون آرزوسی دوفن اولونا
گوزوم یورولدی زبس باخدی کربلا یولونا
الیم یتشمدب عباسیمین اوزون قولونا
علینون اوغلی او مشکل گشا دوشوب یادیما
او زینبی که سو وَردون همیشه خاطرینی
مقایسه ایله بیر اولّیله آخرینی
یتور الهب منه یدّی قارداشین بیرینی
دلاوران دیار بلا دوشوب یادیما
انیس اولوب سنه خاطر غم زمانه منه
نه خانه قالدی غمونده نه آشیانه منه
غریب آنام کیمی چوخ دگدی تازیانه منه
بو حالدا حضرت خیر النّسا دوشوب یادیما
شاعر : کلامی زنجانی
موضوع: حضرت زینب کبری (س) زبانحال ,
زبان شعر و شاعر: نوحه ترکی , کلامی زنجانی
زبانحال حضرت زینب (سلام الله) در حال احتضار
ئولورم گل آغلا بیر آز منه
سنه من چوخ آغلامیشام حسین
آنامین او قانلی امانتین
سینم اوسته ساخلامیشام حسین
داریخوب بو آخر عمریده
اؤرگیم آنام جانی شامیده
الیم آشنالره چاتمادی
منی یاد ائدن هانی شامیده
باجیوین سینوب باشی کوفه ده
یارامین آخوب قانی شامیده
یارالی باشا نه حنا قویوب
نه هوروب داراخلامیشام حسین
آنام اوغلی عشق و محبتون
هله جان و خون و رگیمده دی
بیلن اولسا قرمزی خطیلن
یازیلوب آدون اورگیمده دی
منی چوخ دوگوبله سنه گوره
یئری قمچینین بیلگیمده دی
نه بیلور فلک بو الیمله من
نچه یاره باغلامیشام حسین
دئمورم سنه قوشولوب گله
ایکی نازدانه بالام گرک
اولاری گتورمه که گلسه لر
باشیمی اشاقه سالام گرک
سنه عاشقم من ئولنده ده
بالا حسرتینده قالام گرک
که یر آچماز آیری محبته
بو اورک که داغلامیشام حسین
نچه یول ئولوب دیریلم اگر
اورگیم نشان اولا داغلارا
آلیشوب یانام کولومی فلک
سؤورا سپه اوجا داغلارا
گنه آرزو ائدرم دگه
دوداقیم او قانلی دوداغلارا
بو هوسله شامه کیمی گزوب
یریوی سراغلامیشام حسین
بو خمیده قد باجیوین گرک
هدفی جوانلارا درس اولا
بو رویه مکتب عشقیده
هامی قهرمانلارا درس اولا
گئده کربلاده کی گلشنی
گوره باغبانلارا درس اولا
نه خزانه گللری وئرمیشم
نه باغون ایاخلامیشام حسین
من او زینبم که بو شهریده
علم قیامی اوجاتمیشام
یوخودان بو خلقی اویاتماقا
گجه لر خرابه ده یاتمیشام
باشیم اهل شامه اگلمیوب
دانیشوب حماسه یاراتمیشام
یتش ایندی دادیمه هاردا گور
دیزیمی قوجاخلامیشام حسین
شاعر : کلامی زنجانی
موضوع: حضرت زینب کبری (س) زبانحال ,
زبان شعر و شاعر: نوحه ترکی , کلامی زنجانی
در مدح حضرت زینب (سلام الله)
گوهرکنز پربها زینبین اللرینده دی
رمز کلید مدعا زینبین اللرینده دی
دردیوه ایستسن دوا زینبین اللرینده دی
چاره ی کل ابتلا زینبین اللرینده دی
ناخوشا نسخهٔ دوا زینبین اللرینده دی
حجت حق او زادهٔ فاطمه ی مکرمه
توصیه ایلیوب هامی ملتمسان عالمه
ئوز سوزیدور او حضرتین مطلبمه مقدمه
دردوز اولاندایالوارون صدقیله زینب عممّه
حاجتی ایلماق روا زینبین اللرینده دی
باجی زمانه گورمیوب زینب او با وفا کیمی
ایلیه خدمت اللی ایل قارداشینا آنا کیمی
سوزدانیشانداکوفه وشامیده مرتضی کیمی
کامه چکردی خطبه سی دشمنی اژدهاکیمی
چشم کلیم باعصا زینبین اللرینده دی
زینب او دخت فاطمه عالمه بی معلمه
دوقوز امامین عمه سی شهره اولان عوالمه
منطقی محکم ومتین نابغه ی مکالمه
قبره گئدنجه صبر ائدوب اگمه دی باش تألمه
آری صحیفهٔ ولا زینبین اللرینده دی
ای ره وصلت آختاران سالما ئوزون مشقته
قوی قدم عشق یاریله دایرهٔ محبته
ئوپ گوزل آستانه سین چات درجات رفعته
زینبه عرض ائله خانم یوللا منی زیارته
چونکه برات کربلا زینبین اللرینده دی
مکتب مرتضی علی زینبی ائتدی تربیت
تا وئره اقتداریلن عالمه درس معرفت
بعد شهادت حسین تاپدی بیر اوزگه منزلت
اولدی یگانه رهبر قافله ی مقاومت
رونق دین مصطفی زینبین اللرینده دی
بیر خانمی که خادم درگهی جبرئیل اولا
آدینی انتخاب ائدن ذات حق جلیل اولا
مدحت زین العابدین عزتنه دلیل اولا
حقه قسم عزیز اولارهر کس اونا دخیل اولا
دیده ی شاه و هم گدا زینبین اللرینده دی
سینه دن عشقی زینبون رفع غم و بلا ائدر
قلبی توز آلسا نورینون جلوه سی پرجلا ائدر
جذبه ی حسنی عالمی عشقینه مبتلا ائدر
لطفیله باخسا هرکسه جان مِسینی طلا ائدر
جوهر پاک کیمیا زینبین اللرینده دی
شاعر : استاد کلامی زنجانی
موضوع: حضرت زینب کبری (س) مدح ,
زبان شعر و شاعر: نوحه ترکی , کلامی زنجانی
در شهادت حضرت امام حسن مجتبی (علیه السلام)
آچ گوزیوی یاتما بئله حسنجان
زینبی آغلاتما بئله حسنجان
من چکه بولمم بلوسن فراقون
گه یغیسان گه آچوسان ایاقون
وجهی ندور پارچالانوب دوداقون
خون دله باتما بئله حسنجان
کیم سنی بو حاله سالوب عزیزیم
گل کیمی رنگون سارالوب عزیزیم
قاسمون افسرده قالوب عزیزیم
گوزدن اونی آتما بئله حسنجان
ای یوزی گون گویده سنه آی آغلار
فاطمه معناده دیر وای آغلار
زینبون افلاکه سالار های آغلار
آی کیمی گل باتما بئله حسنجان
وقت اذان اولدی دوروب اذان وئر
گلدی حسین قلبینه بیرتوان وئر
قاتلوی قارداشوا نشان وئر
اشگیمه قان قاتما بئله حسنجان
یوخدی آنام دل یاراسین بتورسون
قوی دیوم عباس ئوزینی یتورسون
ام بنینی بو ائوه گتورسون
هی گوزون ایسلاتما بئله حسنجان
شاعر : کلامی زنجانی
موضوع: حضرت امام حسن مجتبی(ع) احوالات ,
زبان شعر و شاعر: نوحه ترکی , کلامی زنجانی
احوالات حضرت امام حسن مجتبی (علیه السلام)
ئولورم یاتما اویان دور بوگجه یازینب
حَسنین حالی یاماندور بوگجه یازینب
رنگیم صولوب دوداقلاریم القاندی
آنام باجی جگرلریم دوغراندی
منکه بیرجرعه سو ایچدیم دوداقا جان گلدی
باشیم اوسته بوگجه قاصدجانان گلدی
آنامی سسلدیم آغزیمدان اودم قان گلدی
اودا مندن نگراندور بوگجه یازینب
بوگجه من قوناقام بیکس آنام زهرایه
باجی یاسیم قاریشار تعزیهٔ طاهایه
آنامین قبرینه قبریم اولاجاق همسایه
منی درک ایله آماندور بوگجه یازینب
لب خونینی گوروب گلمه باجی فریاده
قارداشون راحت اولوریوخدی وفا دنیاده
دورایاقه باجی بیرطشت ائله سن آماده
گوزون اطرافه دولاندور بوگجه یازینب
باجی بوآیریلیقین چاره سی یوخ صبرایله
یاغاجاق گرد بلا باشیوه چوخ صبر ایله
ورسالار کوچه ده تابوتیمه اوخ صبر ایله
دشمنیم چوخدی عیاندوربوگجه یازینب
داغیلورگلشن عمروم پوزولور اجلاسیم
ناله هجریمده هم عبدالله ائدرهم قاسم
ئوزون ئولدورمه باجی ایندی گلرعباسیم
او منه مونس جاندور بوگجه یازینب
شاعر : کلامی زنجانی
موضوع: حضرت امام حسن مجتبی(ع) احوالات ,
زبان شعر و شاعر: نوحه ترکی , کلامی زنجانی
در احوالات حضرت امام رضا (علیه السّلام)
دولاشما مدعی ایرانین اهلی اهل ولادی
اوشاقلاری قوجاسی نوجوانی مست ولادی
بو ملّتین علمی معرفت سلاحی دعادی
صفای ملک خراسان صفای کرب و بلادی
پناهیمیز شاهیمیز قبله میز امامِ رضادی
امام کاظمین اوغلی بو ملکه سایه سالوبدی
نه سایه جلوه وئروب هر باخشدا مین دل آلوبدی
حجازی ترک ائلیوب کشور عجمده قالوبدی
او گنبد اوسته یاشیل پرچمی گویه اوجالوبدی
همان علم علم اولیادی قبله نمادی
او گوز که مکّه ده ایستور جلال معبده باخسین
طواف ائدوب حرمی رنگ سنگ اسوده باخسین
و یا او که تلسور روضه ی محمّده باخسین
دیون مشرّف اولوب صحن قدس مشهده باخسین
او صحن وعده گه عاشقاندی عقده گشادی
منادی رضوی خوش ندا وئرور او رمدن
دیور گلن قوناقا اولما ناامید کرمدن
قوناق گدا اولا یا شاه دوشمز آدی قلمدن
عروس جنّت ئوپر ط.سیده اوجالمش علمدن
بو حامی غُربا جان سیّد الشهدادی
قدم قویاندا خراسانه نیّتون ادب اولسون
مشرّف اول حرمه روحون عافیت طلب اولسون
خوشا او زائره دعوت زیارته سبب اولسون
ادب مِلاکیدی مهمان عجم و یا عرب اولسون
دئنن رضا قاپوسی باب لطف و باب رجادی
وئروبدی مژده او حضرت که طوسه کیم گله مهمان
چخارتمارام اونی منده بو اوچ زماندا یادیمدان
بیریسی وقت اجل بیرده قبریده دم بحران
اگر جهنّمه ده گئتسه قویمارام قالا نالان
ضمانت ایلرم،آری او ضامن ضعفادی
اله کلمه سی بیر حصنیدور رضا بیوروبدی
حدیث سلسلة الذهبی چوخ بجا بیوروبدی
عطاسین امّت نیشابورا ادا بیوروبدی
بِشرطِها و اَنَ مِن شروطِها بیوروبدی
ولایت اولماسا یعنی صلات و صوم فنادی
دیولّه بیر قوجا سلمانی اولدی حضرته یولداش
ائدوب محاسنین اصلاح ائتدی قلبنی بشّاش
خوشی گلوب آقانین ایسته دی اونا وئره پاداش
دئدی من ایستمورم سیم و زر ئولنده ولی کاش
هرایمه گله سن هر قدم بیر عمره بهادی
غرض او ئولدی امام رضا هراینه گلدی
ئولن زمان دئدی به به بو نور نور ازلدی
الهی نوکر ئولنده آقا گله نه گوزلدی
کمال عزّته چاتدی ئولنده نقصی دوزلدی
اوچاندا روحی دئدی بو ئولوم حیات بقادی
رضایه وئر اورگون وئرمه بو گوزل گلی زشته
ئوپ آستانه سین اولسون رفیق سنله فرشته
رضانی کیم آقا بلسه یوخ احتیاجی بهشته
دولاشدی بوینوما عشقین طنابی رشته به رشته
دئدیم اسیر رضایم رضا امام هدادی
غریب امام رضانین شرف دیارینه قربان
ائدوبدی معتبر عشّاقی اعتبارینه قربان
یاغش کیمی توکولور رحمتی بهارینه قربان
ادبلی زائر و خدّام و کفش دارینه قربان
بو صحن صحن رضادی و یا که مروه صفادی
گئت ای مخالف عترت یالاندان ائتمه هیاهو
که ذکر عشقیدی درویش عشقه یاحق و یا هو
ضمانت ایلیه جاق شیعیانی ضامن آهو
نقدری ایلسه وهّابی لر جهاندا تکاپو
یورولماروق دئمیشوخ جانیمیز رضایه فدادی
فدا اولوم او امامه که غربت ئولکه ده قالدی
حجازی ترک ائدوب ایرانین اهلینی یادا سالدی
باجیسی قمدا ئوزی طوسیده اورکلری آلدی
وئروبله زهر ستم قلبی یاندی رنگی سارالدی
ولی سارالماقا باخما بو گل بهشته صفادی
دیولّه جانی چخاندا جوادی سسلدی داده
گلوب بالاسی دئدی دردینی بلالی جواده
امام دفن اولونوب قالمادی جنازه آراده
اولیدی کاش خراسانین اهلی کرب و بلاده
دئییدیلر بو حسین نور چشم خیر النسادی
الهی کرب و بلاده حسینه چوخ یارا دگدی
او چولده یاد یاراسی دورت مین اولدی بیر یارا دگدی
آناسی بیلدی فقط اوچ پر اوخ گلوب هارا دگدی
دئدی یارالی بو سینه دوباره مسمارا دگدی
گلنده سینه مه آهسته گل که سینه یارادی
شاعر : استاد کلامی زنجانی
موضوع: حضرت امام رضا (ع) احوالات ,
زبان شعر و شاعر: نوحه ترکی , کلامی زنجانی
حسینون پرچمی
یل یاتار طوفان یاتار یاتماز حسینون پرچمی
دیده ی دوران یاتار یاتماز حسینون پرچمی
بوحسینونده عزیزان پرچمی اوچ رنگیدی
گنبدی اوستونده قرمز یادگار جنگیدی
هم یاشیل اعلان ایدورعباس اونون سرهنگیدی
سن قرا پرچم گوتور بو زینبون فرهنگیدی
سسله هر بنیان یاتار یاتماز حسینون پرچمی
قاره پرچم،قرمزی پرچم،یاشیل پرچم دیور
جاوداندور کربلا،خلقه حدیث غم دیور
تک حسینی لر دیمور بلکه هامی عالم دیور
ای مسیحی لر بو ذکری عیسی مریم دیور
پایه ی ادیان یاتار یاتماز حسینون پرچمی
ای عراقین تپراقی ویر شور و شَینوندن خبر
سنده دی آلتی امام ،ایفای دَینوندن خبر
یانجف یا سامرا یا کاظمینوندن خبر
هرطرفدن اود یاغور قبر حسینوندن خبر
قورخما بوبحران یاتار یاتماز حسینون پرچمی
عالمی ظلمت دوتوب شمعی گزور پروانه لر
آشنالردن دی دوتسون فاصله بیگانه لر
خانه ی امنیّت و احساندی ماتم خانه لر
قوی دیسونلر قاره سین گیدی گنه دیوانه لر
عالم امکان یاتار یاتماز حسینون پرچمی
بیز بو پرچمدن برات آللوخ ایشتسین مدّعی
گیتمه روخ آیری مسیره گیتسه گیتسین مدّعی
طعنه لر بسدی خطا یولدان قیتسین مدّعی
کیفر صدّامه باخسین عبرت ایتسین مدّعی
کاخ نامردان یاتار یاتماز حسینون پرچمی
یوخ موّرخده او قدرت ایلیه حفظ وفاق
چوخ قیامی ثبت ایدوب امّا پوزوب دست نفاق
شاه مظلومان مین اوچ یوزیتمیش ایل بوندان قباق
بیر قیام ایتدی سسیندن تتردی دوقّوز رواق
یازدی هر ارکان یاتار یاتماز حسینون پرچمی
بیر یانا عشق حسین انبوه موکب بیر یانا
یدّی دریا بیر یانا عطشان قالان لب بیر یانا
نسل آدم بیر یانا یتمیش مقرّب بیر یانا
یتمیش عاشق بیر یانا تک غملی زینب بیر یانا
بیلدی یورقون جان یاتار یاتماز حسینون پرچمی
اشقیا قورخوردی عباسین آدیندان تک به تک
گوردولر جنگ ایتمدی گیتدی قالوب شه بی کمک
واردی بیلموردیله زینبده قوای مشترک
تا حسین جان ویردی گوتدی پرچمی عباس تک
سس گلوب وجدان یاتار یاتماز حسینون پرچمی
معرفتسیز کوفیان باشسیز وجودی داشلادی
سجده ده اولدی حسین زینب نمازی باشلادی
سو دویونجا ایچمدی قانلان دوداقین یاشلادی
سسلدی عشقین بقاسی بیز باجی قارداشلادی
موج بی پایان یاتار یاتماز حسینون پرچمی
ای حسینی لر نه دردوز وار دوا زینبده دی
نینوا بیر قانلی صحرادور نوا زینبده دی
اختیارات قوام اولیاء زینبده دی
عشقه آند اولسون کلید کربلا زینبده دی
خیمه ی سوزان یاتار یاتماز حسینون پرچمی
عشقیده آری اسارت وار شهادتدن صورا
باشلادی اوز نهضتین زینب او نهضتدن صورا
وقرینی سندیرمادی مردان غیرتدن صورا
باغلادی بیر قاره معجر باشه غارتدن صورا
یعنی جوشقون قان یاتار یاتماز حسینون پرچمی
چخدی تل اوسته گوروب ایلور عربلر هلهله
قبله ی عشقه دوتوب یوز یعنی قانلی مقتله
سسلدی قارداشیم ای باشی دوشن الدن اله
من بیر ایش گورّم حسین تا عرشیدن بو سس گله
فتنه ی عدوان یاتار یاتماز حسینون پرچمی
ای ابوالفضلیم بو آغلار گوزلریم قربان سنه
اوخلانان مشگی چخارت یاددان دعا ایله منه
ای امیر کاروانیم دور اسیرم دشمنه
سن علمدن مطمئن اول ویرمیرم اهریمنه
شور نخلستان یاتار یاتماز حسینون پرچمی
اکبریم ای هامّیدان آرتیق رسوله بَنزیَن
ای رسول اللّه یولوندا قرمزی خلعت گیَن
ای منی پوزقون گورن گونلرده جان عمه دیَن
ایستورم سندن مدد ای عمّه سین چوخ ایستیَن
تاگورم طغیان یاتار یاتماز حسینون پرچمی
ای جوان قاسم عجب طوی دوتدی عاشورا سنه
باغلادی بیر دسته قرمز گل آنان زهرا سنه
قالدون آتلار دیرناقیندا یانمادی اعدا سنه
ساخلارام منده آناوی تا چاتا نجوا سنه
دیده ی گریان یاتار یاتماز حسینون پرچمی
ای علی اصغر که ایتدون سنده اوز دینون ادا
آخره قالدون ولی عالی مدال آلدون بالا
اوخلانان وقته گولوبسن جان عزیزیم مرحبا
خنده معناسی بودور بیلسین مریدان صفا
غنچه ی خندان یاتار یاتماز حسینون پرچمی
ای "کلامی" یازدیقون اشعاره تحسین ایستمه
اوزگه لر تحسینی بش گونلوقدی تضمین ایستمه
قاره کوینک خلعتوندور رخت زرّین ایستمه
حقّی یاز مولا کمکدی جانه تاْمین ایستمه
پرچم شاهان یاتار یاتماز حسینون پرچمی
شاعر : کلامی زنجانی
موضوع: سایر موضوعات ,
زبان شعر و شاعر: نوحه ترکی , کلامی زنجانی
احوالات کوچ از شام
گئدورم رقیّه جانم امان آیریلیق الیندن
دور ایاقه باغری قانم امان آیریلیق الیندن
گوزی یاشلی باغبان چمن پیمبرم من
گلرم دوباره گئتسم سنی ترک ائدنمرم من
بالام اولماسا یانیمدا وطنه گئدنمرم من
گوزون آچ که خسته جانم امان آیریلیق الیندن
دئمه گلشن وفانی گوزلیم ایاقلادیم من
سنی شامه چان عزیزیم قوجاقیمدا ساخلادیم من
یل اسوب ائدنده برهم تلیوی داراقلادیم من
سنه یار مهربانم امان آیرلیق الیندن
منی غربت ایچره گوزدن نه تئز آتدون عمّه ن ئولسون
گئجه گوندوز ی سرشک غمه باتدون عمّه ن اولسون
یوزی توزلی توپراق آلتدا نجه یاتدون عمّه ن اولسون
بئله یاتما ناگرانم امان آیریلیق الیندن
آچلیوب طناب بیداد اسرا اولوبلا آزاد
قییدوب اساس غارت سنی عمّه لر ائدور یاد
قالوب الده گوشوارن اوجالوبدی عرشه فریاد
نجه گور غمه نشانم امان آیریلیق الیندن
گئدورم دیار عشقه تاپام عالم وصالی
یانورام کجاوه لرده یریوی گورنده خالی
نه دیوم سورشسا اکبر باجیمون نئجیدی حالی
سنه میر کاروانم امان آیریلیق الیندن
بو سوزی «کلامی» یازدی گئجه نین همان زمانی
که ستاره لر سپاهی بزه میشدی آسمانی
ملکوتی بیر سسیلن وئریلوردی صبح اذانی
دئدی منده خسته جانم امان آیریلیق الیندن
شاعر : استاد کلامی زنجانی
موضوع: احوالات کوچ از خرابه شام ,
زبان شعر و شاعر: نوحه ترکی , کلامی زنجانی
اربعین
دور حسینیم شامیدن موکب گلور
اربعینه غم چکن زینب گلور
جان حسین عطشان حسین
قبریوه قربان حسین
ای بو صحراده چاتان آمالینه
من فدا درباریوین اجلانیه
دور ایاقه باخ باجون احوالینه
اهلبیتین دیده ی سیالینه
محرم غم کاشف مطلب گلور
جان حسین عطشان حسین
قبریوه قربان حسین
یتدون عاشورا گونی سن مقصده
بیزدن آیریلدی باشون سرنیزه ده
گلدیم آردونجا عزیزیم غمزده
اول یارالی باشی گوردوم کوفه ده
نیزه ده چون ماه در عقرب گلور
جان حسین عطشان حسین
قبریوه قربان حسین
ایتدی طاغیان کوفه ده بحر فساد
سالدی زندانه بیزی ابن زیاد
نطق ایدوب ویردیم شعار اعتقاد
یعنی آئین حسینی زنده باد
گوردولر احیاگر مکتب گلور
جان حسین عطشان حسین
قبریوه قربان حسین
حق دیوب خوار ایلدیم بیگانه نی
خوفه سالدیم زاده مرجانه نی
شامه گیتدیم تا آلام ویرانه نی
اوردا گوردوم شمعیله پروانه نی
اوخشادون شمعه که وقت شب گلور
جان حسین عطشان حسین
قبریوه قربان حسین
طوره دوندردون خرابه منزلی
تاپدی رونق اهلبیتین محفلی
گوردی، حل اولدی رقیه مشکلی
خیر مقدم سویلدی شیرین دلی
جسم عشاقه او غمدن تب گلور
جان حسین عطشان حسین
قبریوه قربان حسین
شاعر : کلامی زنجانی
موضوع: احوالات اربعین ,
زبان شعر و شاعر: نوحه ترکی , کلامی زنجانی
احوالات کوچ از قتلگاه
دولانور علی قیزی مقتلی
قان ایچنده بیر بدن آختارور
یولون اوسته قافله لنگ اولوب
باجی قارداشا کفن آختارور
الی باشدا دورت طرفه قاچور
قییدور چوخور یره باش ورور
بو نه یردی دخت ابوتراب
قدمین ترابه یواش ورور
یادینا او صحنه دوشوبدی که
هامی بیر یارالیه داش ورور
پوزولوبدی گلشن آرزو
گُلی بلبل چمن آختارور
دیور ا... عزّت هماسینون
ندن آشیانه سی قالمیوب
قولی باغلی قوشلارینون ایوی
تالانوبدی لانه سی قالمیوب
سویولوب وجودی حسینیمون
باشی یوخ نشانه سی قالمیوب
گورورم هرایه آنام گلوب
اودا قانلی پیرهن آختارور
یورولوب اوتوردی یره دیدی
آلوب عطرون اودلانورام حسین
بو قدر که داش توکولوب بورا
گئچه بولمورم یانورام حسین
بدنون نماسی پوزولسادا
گینه من سنی تانورام حسین
منی سن چاغور یریوی باجون
ایتیرور دوباره دن آختارور
حرکت زمانی غم اهلینه
یارانوبدی غصّه لی منظره
اوزینی چمنده هر عندلیب
یتوروبدی بیر گل پرپره
آنالار سرود وداع اوخور
بیری قاسمه بیری اکبره
ایله بیل رباب ایتوروب اوزون
الی باشدا سودامر آختارور
اسرای خسته ی نینوا
هامی دلده آه و نوا گیدور
آنادی باشندا قرا گیدور
باجیدی اورکده یارا گیدور
دوزولوب نظامه کجاوه لر
شهدا قالور اسرا گیدور
دولودی اورکلری دردیلن
ولی خلوتْ انجمن آختارور
گیدوری سکینه یواش یواش
یوزینون اوزین یووا علقمه
دیه شرح حالینی مو به مو
سویانندا صاحب پرچمه
عمو جان دور اللریوه فدا
کمک ایله غصّه لی عمّه
گه چاغیرور هرایه بیبیم سنی
گوزی یولدادی گلن آختارور
شاعر : استاد کلامی زنجانی
موضوع: کوچ از قتلگاه ,
زبان شعر و شاعر: نوحه ترکی , کلامی زنجانی
ورود به ماه محرم
الله الله گنه باشلاندی محرّم دهه سی
دهه ی شاه شهیداندی محرم دهه سی
آیلار ایچره مه تاباندی محرم دهه سی
گور حسین سفره سین احساندی محرم دهه سی
آدی گلدی گوزوم ایسلاندی محرم دهه سی
ای دادان سفره ی احسانیده زهرا دوزونی
آچ محرم علمین اشگیله یو آل توزونی
آغلیان گوزلره باخ یاد ائله عشق اولدوزونی
بو قرا پرچمین آلتیندا کسون قوچ قوزونی
پرچم عشقه نگهباندی محرم دهه سی
ای ادب مشتریسی گوزله عوام اولمیاسان
غمی یاددان چیخادوب شادلیقا رام اولمیاسان
باخ امامین سؤزونه ضدّ نظام اولمیاسان
سعی ائله منحرف از خطّ امام اولمیاسان
بویوروب محیی ایراندی محرم دهه سی
بیزه هرنه یتیشوب اهل نظردن یتیشوب
وجهه بو مملکته صبر و ظفردن یتیشوب
نصرت ایرانه محرّمله صفردن یتیشوب
شهدایه اؤ شرف بیر صودامردن یتیشوب
اصغرین قتلینه اعلاندی محرّم دهه سی
دئمورم الده اولان عزّتیوه ناز ائلمه
دئمورم پرچم ایرانی سرافراز ائلمه
دیورم فرعی دوتوب اصلیدن اعراض ائلمه
قافیه عیبینی دوتما هنر ابراز ائلمه
شعریده قافیه گرداندی محرم دهه سی
آقاما قربان اولوم ایرانی پیروز ائلدی
باشی دالدان کسیلوب ایمانی پیروز ائلدی
نِی ده قرآن اوخودی قرآنی پیروز ائلدی
بلی اسلامی حسینون قانی پیروز ائلدی
بیل اؤ شمشیری یخان قاندی محرم دهه سی
فجر حسین نور حسین جلوه ی منهاج حسین
دوغولان گون ائلین گویلره معراج حسین
شهدا باشینه قانیله قویان تاج حسین
وئردی جان وئرمدی اهل ستمه باج حسین
اؤ اوجا همّته برهاندی محرّم دهه سی
دلده عالم بویی سؤز وار گچورم سوزلردن
عشق مولا آییرار ایری لری دوزلردن
ائتمدی شرم اوخ آتان بیرجوت آخان گوزلردن
گوزیاشی چاتدی ربابه گجه گوندوزلردن
ننه احوالینه حیراندی محرم دهه سی
اوندا که الدن اباالفضل علمی دوشدی یره
اوخلانان مشگی حسین گتدی ئوزی خیمه لره
العطش دلده هامی تیکدی گوزین صودامره
گوردولر گوزلر آخور جانی دوشوبدی خطره
اؤ غمه ایندیده سوزاندی محرم دهه سی
خیمه لرده دئدی مولا ندی شیون بیلورم
وئردون اول طفلی منه دردینی دلدن بیلورم
ای رباب آغلاما من غنچه وی گلشن بیلورم
سن ئوزون یورما بالامون دیلینی من بیلورم
غمه دؤز دهّه ی هجراندی محرم دهه سی
سیردن کاش قالیدون اؤ گون ای چرخ کهن
گور هارا چکدی حسینون ایشی ایام محن
سسینه وئرمدی سس چول دولوسی اهل فتن
صودامر بیر بالا اولدی اونا لبّیک دیین
گویده قوشلار آقاما یاندی محرم دهه سی
سس دوشوب لشگر آرا ناظر اولون جریانه
باغبان علوی گل گتورور میدانه
قونداق اوخشوردی قوجاقدا ورق قرآنه
دئدی بیر آز سو وئرون بو دوداقی عطشانه
دیلی یوخدی سیزه مهماندی محرم دهه سی
کاش سعد اوغلی دییدی آقا گئت باخما سووا
آب دریا قوتارار جرعه سو وئرساخ بالووا
سسلدی حرمله نی تا قانی قانیله یووا
دئدی چوخ ضربه گوروب هاشمی لردن بو قوا
اوخون آت موقع جبراندی محرم دهه سی
حرمله دیزلرینی وردی یره یوخ دئمه دی
شیرخواره بالیا نیلیه جاق اوخ دئمه دی
اوخ گلوب دگدی بوغازدان بالا هئچ اوخ دئمه دی
دوداقی گولدی بیر آز، آغلامارام چوخ دئمه دی
عالم اول گولماقا گریاندی محرم دهه سی
کیم گوروب جانی چیخاندا اوشاقین گولماقینی
کیم گوروبدی سو یانیندا بالیقین ئولماقینی
گوردی زهرا آقامین قان یارادان سیلماقینی
بالانین دردینه پیکانی دوا بیلماقینی
دئدی اوغلوم بالان اوخلاندی محرم دهه سی
جان بالا غملی بالا اوغلوی آز باغریوا باس
فاطمه سس وئره نوندی بو ندایه قولاق آس
دئمه عباسیم ئولوب ایلمه تکلیق احساس
آلا بیلمز قوجاقا اوغلووی قولسوز عباس
منه وئر جان سنه قرباندی محرم دهه سی
جان بالا صبریوه گویده متعجّبدی ملک
بیر اووج قان گویه سپدون بزنوب قانلا فلک
مرحبا عشقیوه عاشقلریوی ائتدون الک
مین سپاهه دگر عشق عالمی بو قانلی بلک
اصغرون عالمه سلطاندی محرم دهه سی
وئر منه گوهریوی غملی آنان گوهری دی
گوهرون سیندی ولی الله اونا مشتری دی
وئر باسیم سینمه سینم شهدا دفتری دی
ئوز نوه مدی اؤ بالا محسنیمون بنذری دی
اونا محسنده نواخواندی محرم دهه سی
شاعر : کلامی زنجانی
موضوع: ماه محرم ,
زبان شعر و شاعر: نوحه ترکی , کلامی زنجانی
در احوالات امیرالمومنین حضرت علی (علیه السلام)
سبک : بزم عزاده گیمیشم ....
جان یاامیرالمؤمنین،ای شه مردان
عرض نیازه گلمیشوق،قیل بیزه احسان
یامولا، یا حیدر/ ای جان پیغمبر
ای قبرپاکی شمع اولان بیزده پروانه
سن باخماسان زوّاریوه دل دؤنرقانه
لطف ائیله مولاگلمیشوق باب احسانه
سن ساقی کوثرآقا_بیزهامی عطشان
یامولا،یاحیدر/ای جان پیغمبر
گلزارجان تاپدی صفا بوزیارتدن
عشاقه ایوان نجف باشدی جنّتدن
باش گئتسه ده ال چکمه ریق بیزولایتدن
ایلرولای اهلبیت_دردلره درمان
یامولا،یاحیدر/ای جان پیغمبر
جان یاعلی ای دم وئرن کل انفاسه
واردلده شوق کربلاباخ بواحساسه
سن بیل حسین جانی بیزی تاپشیرعباسه
باب الحوائجدوربالان حامی قرآن
یامولا،یاحیدر/ای جان پیغمبر
شاعر : استاد کلامی زنجانی
موضوع: حضرت علی (ع) احوالات ,
زبان شعر و شاعر: نوحه ترکی , کلامی زنجانی
در احوالات امیرالمومنین حضرت علی (علیه السلام)
سبک : ای قلم سوزلرینده اثر یوخ
مسجدکوفه ده محشراولدی
قان آخیب چشم مولایه دولدی
سیندی ظلمیله رکن عدالت
آل پیغمبرین باغی سولدی
یاعلی یاعلی جان یارالی
یاره لی باشه قربان یارالی
جان عالم فدااول نمازه
خنجرآلتیندارازونیازه
کعبه مولودی معراجه گئتدی
چیخدی طاهااؤزی پیشوازه
یاعلی یاعلی جان یارالی
یاره لی باشه قربان یارالی
دهریدن مرتضی قلبی دویدی
تیرمحنت دل‌ِ زاری اویدی
آق محاسن قیزیل قانه باتدی
زینبین گوزلرین یولداقویدی
یاعلی یاعلی جان یارالی
یاره لی باشه قربان یارالی
کشتی دینی طوفان آپاردی
حیدری سجده ده قان آپاردی
جنّته کوفه دن مرتضانی
فاطمه گلدی مهمان آپاردی
یاعلی یاعلی جان یارالی
یاره لی باشه قربان یارالی
گوزیاشی مجتبانین آخاردی
یاندیریب عالمینی یاخاردی
هم حسین آغلییب هم ابوالفضل
خالی محرابه هردم باخاردی
یاعلی یاعلی جان یارالی
یاره لی باشه قربان یارالی
شاعر : استاد کلامی زنجانی
موضوع: حضرت علی (ع) احوالات ,
زبان شعر و شاعر: نوحه ترکی , کلامی زنجانی
قره پرچم
یاد آورایام محرم قره پرچم
اعلان عزا رونق ماتم قره پرچم
قاره علمی هریره معبرده وروبلار
احرار اونی مسجدلره سر درده وروبلار
بیت اللهه باخساندا قرا پرده وروبلار
بو پرچمی فکر ایتمه فقط یرده وروبلار
گویلرده وروب عیسی مریم قره پرچم
یاتماز بو علم تاکه بشروار یر اوزونده
بیگانه لرین یوخدی اثر یاوه سوزنده
هیئات حسینی اولارین اوخدی گوزونده
نامرده ورار سیلی محکم قره پرچم
بو پرچمی زینب که عزاخانیه وردی
پرچم دیمه خنجردل بیگانه وردی
سیلی دهن زاده مرجانیه وردی
بیرتوزلی علم شامیده ویرانیه وردی
الاندا اسر اوردا مسلم قره پرچم
ای هیئتیلر تپراق اولون عشق ایاقندا
قاره علمی نصب ایلیون گوز قاباقندا
گورجک اونی تترر دلی حتی اوشاقندا
معناده دیر اصغر حسینون قوجاقندا
من باش چکرم هیئته گورسم قره پرچم
ور قاره که اسدیقجا دل دشمنی سیخسون
زهرا خانمون قویما سنق قلبی داریخسون
کیم قاره علم ورسا گوروم آق گونه چخسون
ای طعنه وران گیت ایون عباس آقا یخسون
نامحرمه هاردان اولی محرم قره پرچم
شاعر : استاد کلامی زنجانی
زبان شعر و شاعر: نوحه ترکی , کلامی زنجانی
در احوالات امیرالمومنین حضرت علی (علیه السلام)
بوگئجه کلثومه مهماندور علی
صبح آچیلساقانه غلطاندورعلی
چیخما ای گون صبرائله
دم غنیمتدور هله
بوگئجه کلثومه مهماندور علی
صبح آچیلساقانه غلطاندورعلی
چیخما ای گون صبرائله
دم غنیمتدور هله
وارغم آثاری دل احبابیده
منتظر دورغملی معبد عابده
گئتمیه ای کاش ، مولا مسجده
آخرْعمرونده پریشاندورعلی
آزقالوب فرق امام اولسون دو نیم
یوخ شهادتدن دل مولاده بیم
وقت او وقت اولدی اولا زینب یتیم
ائوده گرم ذکر قرآندورعلی
قلب عالم غمدن ایلور اضطراب
گویده وار آثارشور و انقلاب
گوز تیکوبدی آسمانه بو تراب
دهر فانیدن گریزاندورعلی
طول عمرونده علی مغموم اولوب
ایللریله قبری نامعلوم اولوب
الله الله کیم بئله مظلوم اولوب
ظلم الندن سینه سوزاندورعلی
آه او ساعتدن گیوب عالم قرا
وردی اول باشه مرادی بیر یارا
قویمادی باری نمازین قورتارا
گوردولر سجّاده سی قاندورعلی
شاعر : کلامی زنجانی
منبع : محفل حیدریون
موضوع: حضرت علی (ع) احوالات ,
زبان شعر و شاعر: نوحه ترکی , کلامی زنجانی
در احوالات امیرالمومنین حضرت علی (علیه السلام)
سبک : یخلوب عباسیم
یخلوب راز اوسته راز و نیاز اوسته
علی نماز اوسته بویاندی قانه
یوخ اورکلر تابی دوتوب قان محرابی
شیعه لر اربابی بویاندی قانه
یا علی یا مولا - علیجان یا مولا
باشا دگدی شمشیر سینوب رکن تکبیر
دئدی روح الامین الله اکبر
گل خلقت سولدی گوزینه قان دولدی
حسین یتیم اولدی الله اکبر
هانی جان کوفه نگهبان کوفه
یتیمان کوفه گیوبلر قاره
حسن آغلار الله سینه داغلار الله
عزا ساخلار زینب یارالی
شاعر : کلامی زنجانی
منبع : مجمع شعرا و مادحین
موضوع: حضرت علی (ع) احوالات ,
زبان شعر و شاعر: نوحه ترکی , کلامی زنجانی
وصیت امیرالمومنین حضرت علی (ع) به حضرت امام حسن (ع)
بنشین دمی کنارم
ای جان من حسن جان
اکنون رسیده وقتِ
هجرانِ من حسن جان
غمخوارمستمندان ازپافتاده دیگر
جسمم توان خودراازدست داده دیگر
فردامرانبینی ای شاهزاده دیگر
بنگربه شانه های لرزان من حسن جان
ازمحنتم بلنداست صوت فغان زینب
واغربتاست هردم ذکرزبان زینب
من میروم عزیزان جان توجانِ زینب
حافظ بودشمارایزدان من حسن جان
تاریک گشته امشب کاشانه ی یتیمان
بعدازپدرتوهستی پروانه ی یتیمان
ازلطف سرکشی کن برخانه ی یتیمان
گریدبه حال ایتام چشمان من حسن جان
کن از رهِ مروّت باقاتلم مدارا
گرزنده مانم ای جان شایدکه بخشم اورا
درمان وَگرنیابم دارم همی تمنّا
یک ضربه زن که عدل است فرمان من حسن جان
نگذاشت ابن ملجم کامل شودنمازم
زدضربتی به فرقم وقت نیازورازم
فُزتُ وربّ کعبه گفتم که غرق نازم
شدلاله گون به محراب دامان من حسن جان
بردیدنم خبرکن اهل حرم بیاید
گشته حسین مضطرآماج غم بیاید
گوماه آل هاشم عباس هم بیاید
تسکین دهدبه قلب سوزان من حسن جان
گویدغم دلت راچشم ترت عزیزم
برسرمزن سلامت باداسرت عزیزم
من میهمانم امشب برمادرت عزیزم
درحال انتظاراست جانان من حسن جان
شاعر : حاج ولی الله کلامی
منبع : مجمع شعرا و مادحین
موضوع: حضرت علی (ع) احوالات ,
زبان شعر و شاعر: نوحه فارسی , کلامی زنجانی
توسل به امیرالمومنین حضرت علی (علیه السلام) و گریز به شهادت
مریض عشقیوم آقا علی علی
مگر بو درده وار دوا علی علی
اَتیم قانیم دئیر علی علی علی
چخار جانیم دئیر علی علی علی
سنه فدا اولوم که حق فداسی سن
کیم اولسا ملتجی گره گشاسی سن
گوزوم ضیاسی سن اورک صفاسی سن
حبیب کبریا شها علی علی
رسول اکرمین وزیری سن آقا
دیار رحمتین سفیری سن آقا
آیق اورکلرین امیری سن آقا
ستوده حجت خدا علی علی
نه جلوه جوهره عَرَض گر اولماسا
هامی قبول ائدرغرض گر اولماسا
طبیبی کیم تاپار مرض گراولماسا
یازایندی نسخهٔ شفا علی علی
بیزیم طبیبیمیز اولار مریضه یار
که دردی توختاماز بیر آزدا آرتیرار
مرض چوخالماسا یوخ عشقه اعتبار
همیشه لیق ایله عطا علی علی
سن ای زمانه ده بشیر مؤمنان
ولایتون مهِ منیر مؤمنان
سنه هامی دئیر امیرمؤمنان
قاپوندا ماخلق گدا علی علی
سنی ائدر ملک فلکده جستجو
اولوب فرشتیه وصالون آرزو
شهادتون وئروب نمازه آبرو
وورولدی باشیوه یارا علی علی
باشوندان آخدی قان صحابه آغلادی
حسن حسینیله یاراوی باغلادی
ادبلی زینبون دیزین قوجاقلادی
دئدی یارالیسان بابا علی علی
شاعر : حاج ولی الله کلامی
منبع : مجمع شعرا و مادحین
موضوع: حضرت علی (ع) احوالات ,
زبان شعر و شاعر: نوحه ترکی , کلامی زنجانی
عرض تسلیت به محضر حضرت امام زمان (عج) در عزای حضرت امام جواد ع
یابن الحسن توئی سبب اتّحاد ما
نام مقدّست سندِ اعتقاد ما
امشب شب عزاست بیا یابن العسکری
سوزد جهان ز داغ امام جواد ما
مسموم شد عزیز دل ثامن الحجج
آتش زده حدیث غمش بر نهاد ما
جانها فدای آن گل پژمردۀ رضا
باشد امام نُهم ، امید و عِماد ما
می داد جان به حُجره و میگفت ای خدا
دانی که اهل کین ز چه دارد عناد ما
ما را به جرم عشق تو در خانه می کُشند
غافل از اینکه دارد ادامه جهاد ما
گر مُعتصم خلیفهٔ عباسیان بود
بر عالم است سلطنت عدل داد ما
من وارث رضا گل موسی بن جعفرم
ذلت بری ز ساحت قدس نژاد ما
آگاه از فضیلت من امّ‌فضل نیست
اما خوشم که فاطمه باشد به یاد ما
جان داد و دفن شد پدرم در دیار طوس
حال از فلک گذشته به بغداد داد ما
پروندۀ حکومت من بسته شد ولی
پاینده باد دولت هادیّ راد ما
شاعر : استاد کلامی زنجانی
موضوع: حضرت امام جواد (ع) احوالات ,
زبان شعر و شاعر: نوحه فارسی , کلامی زنجانی
احوالات حضرت امام حسین (علیه السلام)
هلال نقل ایدور او گون حسین یخلدی مقتله
باخوردی تله منتظر باجیسی خیمدن گله
ویروردی قان جراحت عمیق تیر حرمله
دیدیم بو سیدی یخان اورکده کی یاراسیدی
گلن وروردی تیریلن گئدن وروردی سنگیلن
طرفدی زاغیلن زغن یارالی شیر جنگیلن
درنده لر ستیز ایدور سوسوز قالان نهنگیلن
بیری دیموردی ال چکون بو فاطمه بالاسیدی
نه گوردوم حال ضعفیده دگور دوداقی بیر بیره
دیوردی کیمدی بیر ایچم منه بو حال دا سو ویره
امیر لشکره دیدیم سوزینی سالمیاق یره
دانشمادی دیدیم سکوت علامت رضاسیدی
الیمده کاسه جانب فراته قاچدیم آهیله
دیدیم خدا بو خدمتی هلالیدن قبول ایله
سو دولدوراندا آغلاشوب بالقلار ایلدی گله
کیمه سو فکری ایلوسن او زمزمین صفاسیدی
قیتدیم آیری سمتیدن بو سری ئوزگه بولمیه
قاچوردیم احتیاطیلن سو کاسه دن توکولمیه
ئوز عهدیمه وفا ایدم قوناق سوسوزدان ئولمیه
ورم ایچه گوزین آچا سو گوزلرین ضیاسیدی
نه گوردوم اوندا شمر دون گلور گوزونده گوزیاشی
قلنجی قانلی میزبان النده میهمان باشی
قاچور دالیجا بیر خانم او باجیدی بو قارداشی
یانندا خوردا بیر بالا انیس و هم نواسیدی
دیدیم او ظالمه ندن دل هلالی داغلوسان
یالانچی مسلم آیه طهارتی ایاغلوسان
پیمبرین عزیزینی هم اولدوروب هم آغلوسان
دلیل بو جنایته باشوندا ری هواسیدی
باجیسی وا حسین دیور سن هیچ او حاله یانمادون
او سسلننده ساخلا ال بیر آز دورب دایانمادون
یوزون قرا اولیدی هیچ رقیه دن اوتانمادون
اونون باباسی بلمدون یتیملرین باباسیدی
تلسمه دور بو مضطرین ترحم ایله حالینه
هلالم ایلیوم نظر او فاطمه هلالینه
اقلی قوی الیمده که سویی سپوم جمالینه
چوخ حتک حرمت ایلمه او امتین فداسیدی
شاعر : استاد کلامی
منبع : مجمع شعرا و مادحین
موضوع: حضرت امام حسین (ع) احوالات ,
زبان شعر و شاعر: نوحه ترکی , کلامی زنجانی
زبانحال حضرت فاطمه زهرا (سلام الله)
ای فلک من گلِ گلزار ادب زهرایم
خلقتِ آدم و حوّایه سبب زهرایم
فاخرم،مفخر نسوان عرب زهرایم
طاهره شهرتم و پاک نسب زهرایم
راضیه،مرضیه،صدّیقه لقب زهرایم
قادر الله کیمه بیر بیله جلالت وئردی
بگنوب جمع کساده منه عزّت وئردی
رتبه می افضل ایدوب منصب عصمت وئردی
بشرین وجهه سین عرشه یتورن زهرایم
ایویمه روح الامینی گتورن زهرایم
من همان نطفۀ پاکم وار آدیم دللرده
حقّه تسبیح دییردیم رَحِم مادرده
ایتمیشم نشو و نما سینه پیغمبرده
آدی قرآنیده کوثر یازیلان زهرایم
ساقی کوثره همسر یازیلان زهرایم
من همان امّ ابیهایم آتام بوالقاسم
زُهره یَم عرش خدا جایگه اجلاسیم
ایدر آفاقی معطّر اثر انفاسیم
من کیمم،جلوۀ نور ازلی زهرایم
بضعۀ احمد و هم کفّو علی زهرایم
من او معصومیم عصمت منه پیرایه گلوب
آتام احمددی اونا سوره گلوب آیه گلوب
شوهریم نابغه دی کعبه ده دنیایه گلوب
کعبه مولودینی گورجک سئوونَن زهرایم
حاجیلار تک باشینا گونده دؤنن زهرایم
ای فلک باخما منی درده دچار ایلموسن
آتامی الدن آلوب تعزیه دار ایلموسن
بیت الاحزاندا منی درده دچار ایلموسن
من همان ورطۀ طوفاندا قالان زهرایم
مرتضی دامنین اللّردن آلان زهرایم
آند اولا کعبیه انصار خدا معبدینه
آند اولا ئوز قاپوما محسنیمون مشهدینه
کفریدور اجنبی چیخسا آتامون مسندینه
دشمنه شامی گئدوب شوم ایلین زهرایم
خلق ایچینده اونی محکوم ایلین زهرایم
من او زهرایم عدو کوچه ده کسدی یولومی
قونشولار قورخدی گلوب دوتمادیلار ساق صولومی
گورمیوب یاخشی عموغلوم یوزومی یا قولومی
بیت الاحزاندا ایویمدن آرالی زهرایم
دردیمون یوخدی دواسی یارالی زهرایم
اگلشوب ایوده علی ایتدیگی پیمانه گوره
ذوالفقار آلمور عم اوغلوم اَله قرآنه گوره
سوروشان یوخ حالیمی دوشدن آخان قانه گوره
سنّیم اون سگّیز اولور دلده جوان زهرایم
ای جوانلار غم الیندن قوجالان زهرایم
اورگیم دردینی جاندان گئچن احراره دیدیم
گئجه لر قاپلاری بیر بیر دوگوب انصاره دیدیم
سس ویرن اولمادی وای حیدر کرّاره دیدیم
آتش غمده او بی کسله یانان زهرایم
تا نفس واردی دالیندا دایانان زهرایم
من او زهرایم آز عمریمده جگر داغلامیشام
آقامون جنگیده دوخسان یاراسین باغلامیشام
یاراسیندان توکولن قانی یووب آغلامیشام
ای گوزوم آغلا بولود مثلی دولان زهرایم
کوینک آلتدا یاراسی گیزلین اولان زهرایم
دشمنیم سعی ایلدی آلسون الیمدن قدکی
ایسته سم آدیمه معبود یازار نُه فلکی
فدکیم گیتدی،الیمده وار علینون اَتَگی
جامۀ عشق نگاره بورونن زهرایم
سینه یاره،دالیسیجا سورونن زهرایم
آتام اولسیدی بلا سیندیرا بیلمزدی منی
سیل تک غم توکولیدی یورا بیلمزدی منی
قورخولی کوچه ده دشمن ورا بیلمزدی منی
رهگذرده سَنَدی پاره لَنن زهرایم
آی سوز اهلی قولاقی یاره لَنن زهرایم
دؤزرم دلدن آتینان آنامون داغلارینا
گئچدی اول گون که چیخاردیم اُحدین داغلارینا
آپارا بیلمم حسینی فدکین باغلارینا
بابامون ماکینه حسرتله باخان زهرایم
آخ دییَنده یارادان قانی آخان زهرایم
باغیمی ویرسه له بَطحانی گلستان ایدرم
دردیروب میوه لرین سائله احسان ایدرم
بذل و انفاقمیله گبری مسلمان ایدرم
کوینگین طوی گئجه سی بخشش ایدن زهرایم
حجلیه کهنه لباسیله گیدن زهرایم
من او زهرایم ایدر غبطه ملک منصبیمه
قونمیوب دهریده ذلّت توزی چادر شبیمه
شیرزنلیق یولون ئورگتمیشم ئوز زینبیمه
ایندیدن کرب و بلا فکرین ایدن زهرایم
دادینه قانلی بیاباندا گیدن زهرایم
وردی بیعت جریانینده منی دشمن ئولم
منده گیتدیم ورام عشقیله اودا دامن ئولم
آقامون سینسا وقاری گرک اوّل من ئولم
پشت درده شرر افلاکه وران زهرایم
بینوا فضّه نی داده چاغوران زهرایم
فاطمه رتبه سی افضلدی زن دیگردن
ایویمه وار ایکی یول مسجد پیغمبردن
سوروشون گلدی او اوچ یوز نفر هانسی دردن
گوش تاریخه بو اسراری دییَن زهرایم
کفن مرگی همان گونده گییَن زهرایم
گر یغشمشدی اولار بیعت علیدن آلالار
گرک اوندا قاپونی مسجد ایچیندن چالالار
گلدیلر کوچه یولوندان منی دلدن سالالار
قول قناد قوش کیمی جان اوسته چالان زهرایم
آی ملک لر ایاق آلتندا قالان زهرایم
شاعر : استاد کلامی زنجانی
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , کلامی زنجانی
زبانحال حضرت زهرا (سلام الله)
داخی دور ایاقه زینب آناوین یرین یغشدور
ایله منزلی مرتّب آناوین یرین یغشدور
بُلوسن قاپی یاناندان آناوین حالی نجِیدی
مرضی بدون درمان، غمی بی معالجِیدی
بو گیچن چئجه عزیزیم منه چوخ چتین گئجِیدی
دوشه جاق خیاله هرشب، آناوین یرین یغشدور
گوزلیم بقیعه گیتمه که او چول بلالی چولدی
دل مرتضانی اوردا محنین خدنگی بولدی
خبر آلسا قونشولار گر نیه فاطمه تیز اُلدی
دی نهانیدور بو مطلب، آناوین یرین یغشدور
آناوی قیزیم بو امّت غم و ابتلایه سالدی
نه اونا سلام ویردی، نه منیم سلامیم آلدی
تالان اولدی گلشنیم، گور نجه باغبان قوجالدی
ای عزیزه ی مودّب آناوین یرین یغشدور
یادا سال او روزگاری که وصالینه چاتاردون
سنه لایلای دینده گوزیوی یوموب یاتاردون
او اویاق قالاندا سنده دوروب ال باشا آتاردون
قوتاروب او تابیلن تب، آناوین یرین یغشدور
دیمه اول همای قدسین قانادی قیزیم سنوبدی
داخی صبریمون نهالین غمی ریشه دن یونوبدی
پر و بال آچوب بیر آیری چمنه گیدوب قونوبدی
واری دلده ذکر یارب، آناوین یرین یغشدور
وار اگرچه بش یاشون، سن ایویمه بویوک خانمسان
باباجان دی، دمبدم قوی یوزیوی اُپوم جانمسان
آدی زِینِ اَب، رگیمده جریان تاپان قانمسان
بالام ای ستوده منصب آناوین یرین یغشدور
قیزیم آز سیزیلدا، نالن حالیمی دگرگون ایلر
اولی شرمسار ایشیتسه سسیوی شکسته نیلر
حسن و حسین و کلثوم بیله حالی گورسه نیلر
اوزون ایلمه معذّب، آناوین یرین یغشدور
آتاوی او گونکه دشمن بالا بیعته آپاردی
انان اولماسِیدی اوردا منه قاتل ال تاپاردی
توکولردی مسجده قان گینه ولوله دوشردی
آرادان گیدردی مکتب، آناوین یرین یغشدور
گئجه لر آنان بُلردیم سنه دردینی دیردی
باشوا ووراندا شانه سارالان یوزون اُپردی
داخی قالدی توپراق آتدا اوزی هم اورکده دردی
که قِییتمز اول محجّب، آناوین یرین یغشدور
دیمم آغلاما عزیزیم ولی آغلاسان آز آغلا
اورگون بقیعه دوندر آنا قبرینی قاز آغلا
قلمون مژه، یوزون لوح، گِله نامه سین یاز آغلا
ایله اشکیوی مرکّب، آناوین یرین یغشدور
بو دلیله قبره قویدوم گئجه فاطمه عذارین
که قاپومی یاندورانلار تاپا بُلمیه مزارین
یری امنیدور داریخما داخی چکمه انتظارین
یومولوب او حق دیَن لب، آناوین یرین یغشدور
شاعر : کلامی زنجانی
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , کلامی زنجانی
منبع: http://yon.ir/Vxpzu
نظرات (۰)