متن نوحه یارالار سینونده قارداش گل گلستانه بنزر
متن کامل نوحه یارالار سینونده قارداش گل گلستانه بنزر
یارالار سینونده قارداش، گل گلستانه بنزر
آغاریب منیمده زلفیم، چمن خزانه بنزر
نئجه شرح ائدیم برادر باشیمین مصیبتیندن
کی گوروندو بیر نمونه بشرین قیامتیندن
نئچه ساعتین ایچینده، غم و جور شدّتیندن
باجیوون رشیده قدّی، اگیلیب کمانه بنزر
نئجه زینبون رضادیر، سنی یاندیرا حرارت
بیلیسن کی سایبانه، یوخ الیمده استطاعت
بو مکاندا دود آهیم، ائلییر منه حمایت
کسر ایستینین قاباقین، سنه سایبانه بنزر
بو جنازه لر کی باشسیز توکولوبدو ریگزاره
نه جلالیلن سالیبلار، سنی دوره دن حصاره
اولارین باشی جداده، دوزولوبدی چون ستاره
وَسَطینده قانلی باشون منه آسمانه بنزر
سن اوشاقیدون، اوپردی اورگون بابام پیمبر
بو یئره دییردی بیر گون دَیجک یارا مکرّر
گورورم دگیب کئچیب اوخ، سورا سانجیلیبدی خنجر
بو یارا بابام محمّد، دئدیگی نشانه بنزر
جگرونده وار حسین جان، علی اکبرین یاراسی
اورگون قانیله سیراب، اولور هر زمان بناسی
دوشجَکدی شرق و غربه، او یارانین انجلاسی
تر و تازه دیر همیشه، گل ارغوانه بنزر
او زمان گورنده شمرین قانا خنجری بویانمیش
حَرمون، باجون، کنیزون، باشووا گلیب دولانمیش
قاچا قاچدا بو مکانه او قدر ایاق توخانمیش
کی کنار قتلگاهون، ره کاروانه بنزر
بالاجا قیزون رقیّه، او عزیزه نازدانه
دولانیبدی آت دوشونده، اورگی دونوبدو قانه
یوزونه دَگیبدی سیلی، باشی اوسته تازیانه
سارالیب سولوبدو رنگی، ساری زعفرانه بنزر
سن ای آفتاب عزّت، ائله نیزه دن نظاره
نئجه گور بیزه ایشیق گون، گئجه تک اولوبدو قاره
هامی اَختَران عصمت، دوزولوبدو بیر قطاره
ره قبله نین دلیلی، صف کهکشانه بنزر
اورگیم باشین آلاندا، غم و محنتون سحابی
او بیلیر عزالیم من، یوزومه سپر گلابی
توکولور سرشگ چشمیم، یئره ایسلادیر ترابی
گوزومون یاشی آخاندا، مُژه ناودانه بنزر
گزرم بو گلستاندا، گَلنی صفالی گوررم
آچیلان گولون ایچینده، دوزولن تیکانی دررم
قطرات اشکیمیله گل و گلشنه سو وئررم
گوره سن وفالی زینب، نئجه باغبانه بنزر
دل "یحیوی" ده دائم اولو جلوه گر بو نیّت
گینه بیر گئجه جمالون یوخودا ائده زیارت
بیلیسن آشیانی نه قدر تاپار شرافت
دولانور سرای مسکین، او گئجه جنانه بنزر
شاعر: استاد یحیوی
نظرات (۰)